1- رزق الهبل عالمجانين
مبدئيا كده ربنا سبحانه و تعالى هو الوحيد اللى بيرزق ...يبقى ازاى نسب اللى خلقنا ...حاشا لله....ارجوكم اللفظ ده خطير بطلوه نهائى
2-لا بيرحم و لا بيخلى رحمة ربنا تنزل
يا سلاااااااااام....هو انت اللى مش حتخلى رحمة ربنا تنزل؟ بأمارة ايه....لا طبعا ربنا قادر على كل شىء ...ثم ان ربنا رؤوف رحيم...و قسم رحمتة مائه جزء اعطى جزءا فى الدنيا و الباقى فى الاخره و بالجزء ده بترفع الفرسه حافرها عن صغيرها حتى لا تدهسه
3-تور الله فى برسيمه....استغفر الله العظيم.هو ربنا عنده تور؟ ربنا مالك الدنيا و الاخرة و كل شىء ...عنده تور؟ و كمان برسيم؟ لالالالالالالا بتهيألى اللفظ وحش اوى و باين
4-انا عبده المأمور
انت مأمور من مين.؟ ربنا بس اللى يؤمرك!!!!!!! يبقى الاولى تقول انا عبد مأمور من الله مش عبده المأمور
5-يا مستعجل عطلك الله
حاشا لله ان يتهم المولى بتعطيل بشر....في حاجه اسمها قضاء و قدر...الحاجه لو مكتوبلها تتم هتتم...و لو مش مكتوبلها تتم لو وقفنا على اطرافنا مش حتتم
6- البقيه فى حياتك
لما البقيه فى حياتك امال ربنا بيعمل ايه؟ خلاص بقى طالما البقيه فى حياتك يبقى انت اللى حتعيش...غلط طبعا
7-لا حول الله يارب
انت عكست الصفه تماما.....بدل ما ربنا هو الوحيد الذى يملك الحول و القوة....نفيت الحول عن ربنا ....اسمها لا حول و لا قوة الا بالله
8- اعمل اللى عليك...و الباقى على ربنا
مكانش حد غلب....كنت رحت صليت العصر ركعتين و قلت الباقى على ربنا ....لا طبعا لو احنا عاوزين ننطقها صح نقول ....انا عملت ما استطيع و التوفيق من الله
9- شاء القدر
ربنا هو اللى عمل القدر مش القدر هو اللى بيشاء....احنا نقول قدر الله ان كذا و كذا مش شاء القدر ان كذا و كذا
10- ده فلان ده شكله غلط....او فلان عنده عيب خلقى
هو مين اللى خلق فلان.....ربنا و مين اللى شاء ان فلان يطلع كده...ربنا.....ربنا حيخلق غلط؟
ده اختبار من ربنا مش عيب خلقى
11-الله يلعن اليوم ..الساعه ....اى حاجه فيها وقت
حخلى الحديث يرد عليكم
في الصحيح عن أبي هريرة رضي الله عنه عن النبي صلى الله عليه وسلم قال :: قال الله تعالى (( يؤذيني ابن آدم , يسب الدهر , وأنا الدهر , أقلب الليل والنهار ))
12-الزرع ده طالع شيطانى
هو الشيطان اليومين دول بقى خريج زراعه؟ و الله ما نعرف....ربنا هو اللى ينبت الارض ...مش الشيطان
13-امسك الخشب....خمسه و خميسه....كبه فى عينك
الحسد على عيننا و راسنا مذكور!!!!!!!1 انما الخشب و الخمسه و الكبه و الخرزه هما اللى حيحموك من الحسد؟
امال القران و الاذكار و الاحاديث و الادعيه لزمتها ايه؟
14-على الحرام من دينى
الحلفان مهما كان معرض للحنث.....فلما تحنث بيمين زى ده...معناه انك تروح تزنى و تسرق و تنهب و كله تمام , لأنك اقسمت بأن الحرام لابد ان تفعله اذا كان قسمك غير صحيح....و كده كده الحلفان بغير الله شرك به و حرام شرعا
و غيرهم و غيرهم من الفاظ ...ارجوكم يا جماعه فكرو فى اللفظ قبل ما تقولوه
و نسأل الله الافادة لنا و لكم