واحد متضايق من نفسه اول ميشوف العنوان حيقول ايه الاعلانات اللى انت بتعملها دى؟
ايوة بعمل اعلان بس مش اعلان دنيوى اعلان تزود فيه اراضيك و اطيانك فى الجنه , بدل ماهو بيت خليه قصر , و يطل على نهر من لبن لم يتغير طعمه
المتضايق:طب ايه يا عم انت حتتفزلك علينا ازاى يعنى؟
بسيطه حاجه قدامنا و بنهملها اهمال فظيع مع انها كنز
المتضايق:خلص يا عم هي ايه؟ حقول حاضر ...النيه
المتضايق:يا فلاحتك....يا سلام حنعمل ايه بالنيه؟
اقول لك انا نعمل ايه بالنيه
مثال : انت داخل تصلى فرض , و ربنا قال لك كل نيه بأجر , طب ما بدل ما تنوى نيه انوى عشره ميه مليون
المتضايق:يا سلام طب انا حجيبهوملك منين؟
يا عم هات نوايا من تحت الارض ان صعبان عليك تفكر حتى؟
المتضايق:مش مسألة كده بس انا حاجه زى الصلاه حجيبلها نوايا منين؟
اقول لك انا نوايا؟
1-نويت اصلى الفرض عشان ده فرض ربنا و عليا و لازم يؤدوا
2- نويت اصلى الفرض عشان بنى الاسلام على خمس و انا ببنى اسلامى
3-نويت اكتر عدد المسلمين فى الصلاه
4-نويت اعلى شأن دين الاسلام
5-نويت اكبر عدد الناس اللى فى المسجد عشان الناس لما تشوفنا تعرف ان الدين الاسلامى هو الصح
6-نويت اصلى عشان الصلاه بتحفظنى من المعاصى
7-نويت اصلى عشان انا بحب اكلم ربنا علطول مش عاوز وسيط
8-نويت اصلى عشان الايمان عندى يزداد و فرص تركى الى نفسى و الشيطان تقل
9-نويت اصلى عشان الصلاه بتساعدنى على تحريك عضلات جسمى كلها و بالتالى حتخلينى نشيط(حقيقه علميه من معجزات المولى ان الصلاه بأوقاتها هى احسن تمارين للمفاصل عن دراسه اوروبيه كافره)
10-نويت اصلى عشان اهلى لما يشوفونى بصلى يمكن ربنا يهديهم من غير ما انا احرجهم و اقول لهم صلو
11- نويت اصلى عشان ابقى مستحق لقب مسلم
و غيرهم و غيرهم....تفتكر اللى حينوى كل ده بين الادان و الاقامه مثلا,,, حياخد ثواب زى اللى بيدخل نويت اصلى الفرض بس؟؟؟
ابدا والله نفس العمل و نفس المجهود بس صاحب النوايا ثوابه مضاعف بعدد نواياه عن صاحب النيه الواحده
اهتموا بالنيه ....فى اى حاجه ....لو رحت تلعب كورة قول نويت اقوى بدنى على الطاعه بالترفيه لو حتوطى تجيب قلم وقع منك عالارض قول نويت اجيبه عشان اكمل شغلى اللى هو قال فيه النبى العمل عباده....جزانا الله و اياكم ثواب تعدد النوايا
المتضايق : نويت انوى فى كل حاجه