فتحية الشقية
في أحد بيوت المحروسة ..اللي في العين محفوظة ... عاشت فتحية ... البنت الشقية .. مع أبوها وأمها ... وأخوها وأختها .
فتحية كانت بنت شاطرة ... لكنها كانت لئيمة وماكرة .... كانت ليها مغامرات لذيذة ... بس بتنتهي بعلقة من عزيزة .... هنعيش مع بعض في مغامرات فتحية ... ونحكم فعلا هي كانت بنت شقية ؟!!
في أول مغامرة معانا اليوم ... نتكلم عن الحدث اللي جاب لها اللوم .
رجعت فتحية من المدرسة بدري ... دخلت البيت ولا حد بيها يدري ... لقت أبوها وأمها نايمين .. والبيت هس ولا فيه ابن يومين .. قامت فتحية قالت أمي طول اليوم بتبقى تعبانة .... ما أريحها النهاردة وأخليها مني فرحانة ... بس تعملي ايه يا بنت يا فتحية ... آه لو عملت طبق ملوخية ... أو كيكة ريحتها بهية ... قعدت فتحية تفكر ... وكل ما تيجي ف بالها فكرة تقعد تكركر ... لحد ما رسيت على انها تعمل صينية كيكة .. من غير هيصة ولا زيطة ... بدأت جابت البيض والزيت ... بعد ما نكشت كل حتة في البيت ... وجابت السكر والعجان ....... والبيت بقى موريستان ... وأخيرا خلصت الكيكة وحطتها في الفرن ... وسابتها ييجي قرن ... لحد ما صحي أهلها على ريحة شياط .... وبدأت فتحية في العياط ... لحقوا المطبخ بعد ما بقى أسود من الدخان ... والبوتوجاز كان هينفجر زي البركان .. نادت الأم يا فتحية إيه اللي حصل ؟ .... قالت فتحية وهي عندها أمل .. ان أمها تسامحها ... لما تعرف انها كانت عايزة تساعدها ... قالت كنت عايزة أفرحك ... واعمل لك كيكة تنعشك ... وابقى ست بيت شاطرة .. تفتخري بيه قدام جارتنا أم فاطمة ... قالت الأم بصوت حنون ... عقابك ما اتوصفش في القانون ... انت اللي هتجيبيلي عزيزة ... أقدملك بيها وجبة لذيذة .. من الضرب المبرح ... علشان تحرمي تدخلي المطبخ .. انت كان ممكن تتسببي فس موتنا ... علشان ما فكرتيش تستني قومتنا .. واوعي تقربي من البوتوجاز ... ولا ف يوم عمرك تشغلي الغاز ... انت لسة صغيرة .. وخبرتك في الطبخ قليلة ... وف المغامرة دي نالت فتحية .. ليلة مليانة بالحزن والأسية .. لأنها ما سمعتش كلام الكبار ... وعرضت نفسها لخطر النار .... ودي نهاية حدوتتنا ... واستنوا معانا تكملة
الأربعاء يونيو 18, 2008 8:45 am
